我對MC Jin 由參加<<中國有嘻哈>>到出局成個過程的確有啲身同感受。
年輕時體力無窮亦有無限進步野心，喺美國training嘅時候可以一日跳足9，10個鐘無停過都可以。後來年紀大咗體力明顯走下坡(同運動員一樣)，感到無奈同無所適從。當時認識咗一位大我五年嘅世界級BBoy，我問以佢呢種需要大量體力嘅舞種佢點樣同年輕人鬥而令自己喺賽局勝出？佢話年輕舞者體力的確比較高，但係年紀大啲有嘅係經驗，能夠冷靜對待賽局見招拆招，所以贏面有時更大。當時我決定接受自己身體有變化嘅事實，除咗做幕前之外亦決心專心成為排舞師。
好喇，事情係咁嘅，當你過完一關又一關嘅時候一定會有一個點令你停喺一個樽頸位。太過專心排舞令我忽略咗跳舞嘅技術；而且過多嘅作品亦令自己創作靈感有所阻滯。所謂不進則退，你唔add-value後生嘅一輩就會好快爬過你頭。長江後浪推前浪，接受唔到自己已經變咗後浪嘅前輩就自動變成故步自封又乞人憎嘅老cFu。
老cFu係一種心態，佢哋唔一定年紀好大但係通常都比較有經驗。因為佢哋知自己嘅想法已經唔夠後輩新，但係玻璃心之餘又唔想衰畀人睇，所以會盡力詆毁新野，瘋狂刻意刁難新人，事後仲要覺得自己係袋咗錢入你袋想你好好感恩，死未。
我明白我嘅體力已經不再係前浪，但係我深信只要肯back to basic 訓練同了解新trend，再加上經驗同閲曆係足夠留喺浪入面有餘，所以我決定去上芭蕾舞基本堂，同埋去上我自己教出嚟學生嘅堂。
坦白講，你問我有無壓力？身為一個老師一個前輩就真係點都有，其他人嘅眼睛總係望住你總係對你嘅演繹有小小expectation (又或者可能係自己FF啦)，不恥下問從頭學起係需要好大嘅勇氣同氣度。所以我先至話我好明白MC Jin原本已經係一個有地位嘅人物去參加一個年輕人比賽嘅心情。我更加體會到佢被出局之後鼓勵其他年輕人嘅熱淚，因為我每次見到後輩跳自己嘅rountine跳得比自己更powerful更流暢；每次見到後輩成為新晉排舞師完成一隻作品，我嘅心裏面都流住同一樣嘅熱淚。呢個大概係仍然充滿熱誠嘅老師/前輩心情。
真正嘅老師/前輩並唔係擁有最多學生/追隨者嘅人，而係協助最多人成為老師/前輩嘅人 ；一生人並唔在於「你超越過幾多人」，而是你協助幾多個人不斷超越自己。
共勉之。
#女人像鹽 #唔知有無人明我講緊乜
Search